Pungko-Pungko

Ayay, tingbitay na usab. Duha o tulo ka adlaw pa una nako madawat ang akong sweldo pero buslot na ang akong bulsa. Og ngano man sab nga pwerteng kadali mahanaw ning kwarta uy. Pila ka adlaw nimong gipatud-an og singot apan kon madawat na gani nimo, daw sama sa hangin nga moagi lang sa atong mga kamot.

Igo na lang gayud nga iplete kining nahibilin nakong sapi. Wala na ako'y ikagahin para sa McDonald o Jollibee. Maayo na lang gani kay tag dos pesos ra ang kape sa pantry. Dili na ko magduka unya kon motrabaho ako inig ka gabii. Pass lang usa ko sa shake sa Thirsty. Libre na lang nga juice akong imnon kay sa kwarta ako medyo naapiki.

Maayo na lang gani kay adunay pungko-pungko daplin sa kadalanan. Sa traynta pesos nimo nga puhonan, sulbad na ang kagutom sa imong tiyan. Adunay sha-e, ginabot og atay nga pwede nimong kapilian. Lamian og barato, tambal sa nagkutoy nga tiyan.Ituslo sa patis og suka nga may sili og sibuyas, pastilan pagka lamia. Kung ugaling dili ka ganahan, aduna pud tay siomai, ngohiong, bolabola og barbecue pares sa puso o kan-on nga tag singko ang takos. Inig human og kaon, duna tay sparkle, pepsi o mountain dew nga mohilis sa mantika sa atong gikaon.

Sila nag-ingon nga dili maayo ning mokaon ta sa pungko-pungko. Kini tungod sa hulga sa atong panglawas. Kuyaw sa nagkadaiyang sakit kon magpataka ta og kaon ning mga pagkaon nga wala ta nasuheto giunsa paglimpyo. Hayan mataptan ta sa sakit susama sa suka-kalibang, amoebiasis o kung wa kay swerte, hepatitis.

Tinuod makahadlok kining mga sakita. Dili lalim kung mataptan ta ilabi na kung wala tay ikagasto kung ma-ospital kita. Apan usahay dili nato malikayan nga unahon pagtambal ang kagutom kaysa sa sakit nga wala ta masayod kung kita ba mataptan.

Usa ra gayod ang sulbad niining problemaha. Kung kita maka-sweldo na, dili hutdan sa makadali ang atong kwarta. Sa kanunay magdaginot kita. Sa ingon ani nga paagi sa mga sakit makalikay kita.

Mga Sikat

Sa usa ka call center dinhi ning dakbayan, pulos ilado og sikat ang mga indibidwal nga nagsilbi sa pagkaon sa mga kawani. Akong naila-ila ang pipila kanila:
Si 'Kristine' hermosisima ang tigdumala sa cash register inubanan nila ni Piolo paskol, John pranks, Danilo baryo, Zanjoe barumbado, Judy Ann santol, Angelo de relo, Maricar recess og Tanya grasya.
Kini dili hinuon ang tinuod nilang mga pangalan. Gimugna lamang kini sa ilang mga higala nga nagtrabaho didto sa call center. Pero wala nagpasabot nga sila gibugal-bugalan. Kini kabahin lamang sa pagkamahiligon sa artista sa ilang mga suod nga agents.
Silang tanan maayong mosilbi og matinud-anon sa ilang trabaho. Silang tanan gimahal sa mga kawani niadtong establismento nga ilang gialagaran.
Saludo ako sa ilang tanan.

Hudyaka Taliwala sa Kalisdanan

Kaganiha, sa usa ka call center sa dakbayan sa sugbo, nakabati ako sa panag-estorya sa upat ka managhigala. Makita sa ilang mga panagway nga kapoy og luya na kaayo sila. Unang nahiabot sa kan-anan ang duha kanila. Samtang nangaon sila sa ilang pamahaw, mga alas tres na kadto sa kadlawon kon wala ko masayop, nagsige sila og hisgot mahitungod sa ilang trabaho og ang daw dili makiangayon nga binuhatan sa ilang mga kaubanan. Ang usa kanila mihisgot kabahin sa iyang kasagmuyo sa pagkamalabi-labihon sa ilang kaubanan og sa daw way puas nga kalisod nga ilang giagian. Kadtong tanan ilang gihisgutan samtang nagkaon sa piniritong isda nga labihan nga pagka-kagumkom nga ilang gisaw-saw sa patis og suka. Wala madugay miabot ang laing duha nila kahigala.
Sa makausa pa, naghisgot na usab sila sa ilang nasinati nga kaluya. Sa akong tan.aw, daw sa ganahan na kaayo silang moabot ang oras sa ilang pagpamauli. Sa kalit lang, mikuha ang usa kanila sa iyang celfon og mikuha sa hulagway sa iyang mga higala. Diha-diha dayon, nahanaw ang pagmugtok sa ilang mga panagway og nag-iyahay og pahiyom atubangan sa camera. Paghuman niani, napuno na ang kan-anan sa ilang makadani nga katawa. Matag usa kanila misulti og makalingaw nga mga pulong nga migitik bisan sa mga nangaon sa pikas lamesa.
Sa akong nakita, bisan tuod sa ilang kakapoy og kasagmuyo, wala nila kalimti ang pagkatawa taliwala sa mga problema. Mao siguro kana ang rason nganong nakaya nila nga magmata og motrabaho sa dis-oras sa gabii. Nga bisan sa tanan nga kalisdanan, nadasig gihapon sila sa pagpadayon.
Mao kana ang mga tinuod nga bisdak. Makamaong mobuhak-hak og bungisgis bisan pa man sa kapait sa kinabuhi.

Usa ka Adlaw

Naglakaw-lakaw ako sa dalan kaganiha og wala nako malikayi ang paglantaw-lantaw sa mga nagkadaiyang tawo nga iyahay lang sa pag-atiman sa ilang tagsa-tagsa ka gimbuluhaton.

Si dodong, nakig-chacha sa mga sakyanan samtang naglibod sa iyang mga baligyang mantalaan. Si inday, napagaw na itawon og panawag sa mga nangagi aron mopalit sa iyang baligya nga mangga pakapin hipon nga haskang lamia. Si manoy, tua ra sa atbang, nagtahi sa sapot sa estudyanteng hapit na intawon ma-late pero way laing mahimo kundili ang paghuwat kay walay masapin sa iyang tiil. wala pa intawoy kwarta ikapalit og bag-o. Nagbayad pa man gud siya sa eskwelahan kay haduol na ang eksaminasyon sa prelim. Og si manang? tua, nanilhig sa kalsada. iyawat nalang makadawat og seinto-beinte karong adlawa. makapalit na na og NFA nga bugas og isdang tamban-tuloy para ugmang adlawa.

Og ako? Dia sa daplin, naghuwat kanus.a moagi ang dyip nga akong masakyan padulong uli sa among pinuy-anan. Daghan na man unta nanghunong nga taxi sa akong gibarugan pero wala ko'y laing mahimo kundili ang balibaran sila. Siete pesos nalang gyud ning akong gikum-kom nga kwarta. Maglakaw nalang unya ko sa eskina kay wala na akoy ikaplete para sa traysikol mohatod unta nako sa amoa.

Hayyy , ning bugno sa kinabuhi. Usahay makapanghupaw ta og halawom kaayo.

Apan bisan pa man sa tanan, malipayon lang gihapon ako nga gitugahan sa Labawng Makagagahom og kahigayunan nga masinati ang tukmang kaanindot sa kinabuhi bisan pa man sa mga pagsuway og kasakit.